Verse 1
ಈ ವರ್ಸಲಾ ಕಡತ್ ಪೋಂಡೆ್
ಕಡತ್ ಪಿರ ಬರಂದ್.
ಸುಮಾರ್ ಎಣ್ಮ ಸಾರ ಘಂಟೆ
ಕ್ಷಣತ ಉಳಯಿ ಪಾರ್‍ಂಡ್.
ಆಂಡ್ಯೆನ ಪುಣ್ಯ ಯೆನ ಕರ್ಮ
ಅವ್ವೆ ಪ್ರಕಾರ ಪೋಪುಂಡಾ?
ಅತ್ತತ್ತ್ ಒಂಜಿ ದಿನ ಧರ್ಮ
ವಿಚಾರ ಆವು ನಿಶ್ಚಯ.
Verse 2
ನಮ್‌ಮಾತ ಕೃತ್ಯ ನುಡಿ ಧ್ಯಾನ
ಪವಿತ್ರ ಬೊಳ್ಪು ತೂವೊಲ್ಯ?
ಈ ವರ್ಸ ಸೈತ್ ಪೋವೊಡಾಂಡ
ಓಳುಪ್ಪು ನಮ ಜೀವಾತ್ಮ?
ಸೇರೊಣ್ದು ಅಳ್ತ ಸಭೆಟೊಪ್ಪ
ನಂಕಾತ್ವು ನಿತ್ಯ ಭಾಗ್ಯನಾ?
ಅತ್ತಾಂಡ ನಂಕ್ ಸ್ವಾಮಿ ಕೋಪ
ಅನಂತ ಶಿಕ್ಷೆ ತಾಗ್‍ದ್ವಾ?
Verse 3
ದೇವೆರ್ ಏತೋ ಮಮತೆಡ್
ನಮನ್ ನಡಪುಡಿಯೆ
ಆಂಡ ನಮಿಚ್ಛೆ ನಡತೆಡ್
ಆಯ್ಗುಪ್ಪಾ ಪೂರಾ ಮೆಚ್ಚಿಗೆ?
ಬುಡಂದೆ ಕೊರ್ದು ಮಾನ ಸ್ತೋತ್ರ
ಆಯನ್ ಪ್ರೀತಿ ಮಳ್ತ್‌ದೇ
ಈ ಯಾನ್ ಇತ್ತನಾ? ಸಹೋದ್ರ
ಕರಿದ್ ಪೋಯಿ ವರ್ಸೋಡೇ.
Verse 4
ಅತ್ತತ್ತ್ ಅಮ್ಮಾ ಯೆನ ಪಾಪ
ಅನ್ಯಾಯ ಮಿತಿಮಿರುಂಡು.
ನ್ಯಾಯಾದ್ ನಿನ ದಿವ್ಯ ಶಾಪ
ಯೆನನ್ ಪೊಡಿ ಮಳ್ತ್ವೊಡು.
ಏತ್ಯೇತೋ ಸರ್ತಿ ಯೆನ ಪ್ರೀತಿ
ಚೌಲ್ಯಾದ್ ಪೋಂಡು ಕರ್ಮನೇ
ಏತ್ಯೇತೋ ಸರ್ತಿ ಯಾನ್ ನೀತಿ
ಸೆಟ್ಟಾದ್ ತತ್ತ್ ನಡತೆ್.
Verse 5
ಆಂಡಮ್ಮಾ ನಿನ ಪ್ರೀತಿ ದಯ
ಉಂದುಲಾ ಮಿತಿಮಿರ್‍ಂಡ್.
ಈವೊಡು ಯೆಂಕ್‍ಲಾ ಸಹಾಯ
ಏತ್ಯೇತೋ ಸರ್ತಿ ತಿಕ್ಕ್ಂಡ್
ಅನೇಕಾನೇಕ ವರ್ಸೊಳೆನ್
ಬಾಯಿನಾಲಯಿ ಕರ್ಚಿ ಮಳ್ತ್ಂಡ್ಲಾ
ಈ ದಯತ ಸಹಾಯೊಳೆನ್
ಯೇರಾಂಡ ಸಮ ಪಣೊಲ್ಯಾ?
Verse 6
ಯೆನಮ್ಮಾ ಆಯಿ ಪಾಪೊಗಾದ್
ಶಿಕ್ಷೆನ್ ಯೆಂಕ್ ಕೊರಡ.
ಕ್ರಿಸ್ತ್ಯೇಸು ಶ್ರಮೆ ಕ್ರುಸ್ಸುಗಾದ್
ಕರುಣ ದಯ ತೋಜಾಲ.
ಆಪಗ ಯಾನ್ ನನ ಮೇಲ್
ಶರೀರ ಆತ್ಮ ಪ್ರಾಣಲಾ
ನಿಕ್ಕೇ ಒಪ್ಪಿದ್ ಮಾತ ವೇಳೆ
ನಿಕ್ಕಾದ್ ಬಾಳೆ್ ನಿಶ್ಚಯ.