Verse 1
ಕ್ರಿಸ್ತ್ಯೇಸು ಅರಸಾದ್
ನಮೌಳು ಸೇರುವೆ.
ಅನಂತ ಪ್ರೀತಿಗಾದ್
ಮೆಲ್ಲೋಕ ಬುಡಿಯೆ.
ಆಯಗ್ ಅಡ್ಡಬೂರ್ದು
ವಂದನೆ ಮಳ್ಪುಲೆ.
ಯಥಾರ್ಥ ಮಾನ ಕೊರ್ದು
ವಶಾಲೆ ಭಕ್ತರೇ.
Verse 2
ಯೆನಾತ್ಮ ಕಾಯ ಪ್ರಾಣ
ಸಂತೋಷ ಮಳ್ಪುಂಡು.
ಈ ಎಡ್ಡೆ ವರ್ತಮಾನ
ಪುಟ್ಟಾಂಡ್ ದೈರ್ಯೊನು.
ಕ್ರಿಸ್ತ್ಯೇಸೋ ನಿನ ಸ್ಥಾನ
ಯಾನೇ ಯೆನಾತ್ಮಲಾ.
ಶರೀರಲಾ ಈ ದಾನ
ದೆತ್ತೊಣ್ಲ ಕರ್ತವಾ.
Verse 3
ದುಂಬಾಂಡ ಲೋಕದಾಶೆ
ಯೆನಾತ್ಮದಾನಂದ.
ಯಾನಿತ್ತೆ ನಿನ ದಾಸೆ
ಆದುಳ್ಳೆ ಕರ್ತವಾ.
ನಿಕ್ಕಾದ್ ಬದ್‍ಕೆರೆ
ಅಪೇಕ್ಷೆ ಯೆಂಕುಂಡು.
ಯೋಗ್ಯಾದ್ ನಡಪೆರೆ
ತೋಜಾಲ ಮಾರ್ಗೊನು.
Verse 4
ಭೂಲೋಕ ಭಂಙೊಳೆನ್
ದೆತ್ತ್‌ದ್ ಪಾಡುವ.
ಅನಾಥ ದೀನೆರೆನ್
ಈ ಮಿತ್ತ್ ದೆರ್ಪುವ.
ಈ ಲೋಕದ ಆಶ್ರಯ
ಯೆನಡ್ದ್ ಪೋನಗ.
ವಿಚಿತ್ರದ ಸಹಾಯ
ತೋಜಾವ ಕರ್ತವಾ.
Verse 5
ಕ್ರಿಸ್ತ್ಯೇಸೋ ಕಷ್ಟೊಳೆಡ್ದ್
ತಪ್ಪಾಯ ಯೆನನ್.
ಯೆಂಕಿತ್ತಿ ನಾಚಿಗೆಡ್ದ್
ಬುಡ್ಪಾಯ ಪ್ರೀತಿಡ್.
ನಿಜಿತ್ತಿ ಸಮಾಧಾನ
ನಿರ್ಲಯದೈಶ್ವರ್ಯ.
ಸೆಟ್ಟಂದಿ ನಿತ್ಯ ಮಾನ
ಯೆಂಕುಂಡುಮಳ್ತ್‍ದ.
Verse 6
ಯೆಂಚಿತ್ತಿ ಮಲ್ಲ ಪ್ರೀತಿ
ಔಳಿತ್ತಿ ಸುಖೊಳು.
ಸೌಭಾಗ್ಯದವು ಸ್ಥಿತಿ
ಈ ಬುಡ್ದು ಲೋಕೊಡು.
ಪಾಪಿಳೆ ಕರ್ಮೊಳೆನ್
ಮಾಜಾದ್ ಬುಡಿಯ.
ಈ ಮಲ್ಲ ರಕ್ಷಣೆನ್
ಸಮಾದ್ ಪಣೊಲ್ಯಾ?
Verse 7
ಸಹಾಯ ನಾಡು ಜನಾ
ಧೈರ್ಯೊಡು ಉಪ್ಪುಲೆ.
ಆಧಾರ ಉಂಡು ನನ
ಸಂಶಯ ಮಳ್ಪಡೆ.
ಸಂತೋಷ ಮಳ್ತ್ ಬಲ್ಲೆ
ಕ್ರಿಸ್ತ್ಯೇಸು ಸಜ್ಜನೆ.
ಓಳೋಳುಲಾ ಪಿನ್ಪಾಲೆ
ರಕ್ಷಕೆ ಆಯೆನೇ.
Verse 8
ಪಾಪಿಳೆಗಾದ್ ಬತ್ತೆ
ಸೈತಾನ ಕೆಲಸ.
ಅಳಿಪುನೆಕ್ ಜತ್ತೆ
ವಿಮುಕ್ತಿ ಅಪಗ.
ಸಮಸ್ತ ಪಾಪಿಳೆಗ್.
ತಯಾರ್ ಆದುಂಡು
ಕೇಣೊಣ್ಲೆ ರಕ್ಷಣೆಗ್
ಅಡ್ಡಿಜ್ಜಿ ಲೋಕೊಗು.
Verse 9
ನನೊಂಜಿ ಸರ್ತಿ ಬರ್ವೆ
ಲೋಕದ ತೀರ್ಪುಗು.
ನಂಬಂದಿನಾಯೆ ಅರ್ವೆ
ಆ ಮಲ್ಲ ದಿನೊಟು.
ಆಂಡ ವಿಶ್ವಾಸದಾಯೆ
ಉಪ್ಪೆ ಸಂತೋಷೊಡು.
ಯೇಸೋ ಯಾನ್ ನಿನ್ನಾಯೆ
ಸೇರಾಲ ಬೊಳ್ಪುಗು.